Umpama adalah seni berkomunikasi Suku Batak. Di bawah ini ada beberapa umpama yang dapat digunakan untuk memberi semangat dan nasihat.

1. Sapala na mardalani, unang olat ni sigalangan. Sapala naung ditobus Debata, bah… unang ma diparalangalangan. Alai gabe siulahon hata i ma hamu unang holan panaginangi asa tutu hamu siihutton Kristus i.
2. Tubu simarlasuna, di dolok ni sibuluon. Sude antong na ni ulamuna tung dipasupasu Tuhan. Unang ma mabiar hamu molo tapangido manang aha marguru tu lomo ni rohana, tangihononna do hita jala dilehon tu hita angka na tapangido i saluhutna jala tongtong do hita dipasupasu Tuhan.
3. Lubuk ni lobutua, di bahen halak panjalaan. Sahat mahita saurmatua ai nungga malua hita sian angka parmaraan. Ai naung holom hian do hita alai tiur do anggo nuaeng dibagasan Tuhan i, marparange ma hita songon anak hatiuron.
4. Bagot na mandungdung ma tu pilopilo na marajar, sai salpu ma angka lungun, sai roma angka najagar. Alai lumobi sian i dope, ai itahalshon do nang angka haporsuhon, ala taboto, dihorhon haporsuhon i do habengeton ni roha, jala dihorhon habengeton ni roha i do hatauon, jala hatauon i do mangkorhon pangkirimon.
5. Balintang ma pagabe, tumundalhonon si tadaon. Arinta ma gebe, molo masipaoloan. Mangasahon Goar ni Tuhanta Jesus Kristus, asa sahata hamu saluhutna, unang ma adong parbolatan di hamu. Hot ma hamu binahen ni sada ni roha dohot sada ni pingkiran.
6. Ampapaga dolok, tu ampapaga ni Humbang. Bah… hita do marsogot, laos hita do nang haduan. Alai patut do hita na margogo i manganju hagaleon ni angka na hurang gogo, jala unang ma tahasiani dirinta. Ganup ma hita mambahen halomoan ni dongan, laho padengganhon jala pauliulihhon.
7. Sambil na tartondong, dapotsa papaluan. Asa denggan mardongan, unang masipamaluan. Ale angka dongan, molo tung tarsomong jolma mardosa, hamu angka naung taruli di tondi ma patureturehon ibana marhitehite tondi na lambok; alai matahon dirim, sotung dohot ho tarajumi. Marsiurupan ma hamu mamarsan angka na dokdok i, ima dalan mangaradoti patik ni Kristus.
8. Tombak sulusulu parasaran ni haluang, jolma naporsea do hita so mohop mida uang. Ai tarsurat do: urat ni nasa hajahaton do roha na holongan di hepeng, i do disangkapi na deba umbahen na lilu sian haporseaon i, gabe di aithon do godang na bernit tu dirina.
9. Sibigo ambaroba rara hulinghuling na, gabe uli do parrupa na roa, asal ma sai lambok pangkulingna. Angkup ni i, ale angka dongan, pingkiri hamu ma nasa parange na sintong, na daulat, na tigor, na bontor, na uli, nadenggan begeon ro di sude na targoar haburjuon na tau pujipujian.
10. Bona ni aek puli di dolok ni sitopongan, sai tubu ma di hamu angka na uli, lam martamba nang sinadongan. On do dipangido Debata, naeng ma lam sumurung holong ni rohamuna, marurat di parbinotoan dohot di nasa panimbangon partondion, laho manangkasi na rumingkoti i, asa polin hamu, so partuktuhan, sahat ro di ari ni Kristus.